Connect with us

أخبار مصرية

شيزوفرينيا.. إن كنت ناسى افكرك

 

طل السيد محمد ابو السعود رئيس النادى الإسماعيلى السابق فى مداخلة هاتفية على شاشة قناة الحدث وقد كنا هنا فى اسماعيلى لايف نرغب بنشر المداخلة اذا كانت فى سياق يليق برئيس سابق لنادى كبير.

ولكن لابد نعقب على هذا الأمر الذى يحدث ولأول مرة بأن ينتقد رئيس نادى سابق إدارة رئيس نادى حالى.

السيد محمد ابو السعود مثله مثل اى مشجع يعشق النادى الإسماعيلى حزين على النتائج وحزين على وضع الفريق وهذا حقه تماما وحتى المجلس الحالى من المؤكد حزين ولكن السيد محمد ابو السعود ليس مثله كمثل مشجع عادى.

بتحليل كلام رئيس النادى السابق نجد ان الكلام غير منطقى ومغاير للحقيقة تماما.

قال رئيس النادى السابق …

١- استحملنا عواد وباهر…

مين اللى استحمل عواد؟

هذه صورة من إيصال استلام نقدية محمد عواد مع نادى الزمالك والذى وقعه فى الإمارات ولما عواد رفض المقابل المادى حضرتك اعارته لنادى المصرى.

مين كمان اللى استحمل باهر؟

باهر لعب فى أربعة سنوات عهد حضراتكم مباراة واحدة يوم ٢٠ يناير ٢٠١٦ أمام النادى الأهلى، أين الاستحمال فى كده؟

٢- عاملين منظومة ٥ او ٦ لاعبين فى كل مركز ٣ كبار وواحد من الفريق الشباب او ٢ من قطاع الناشئين…

حضرتك مطلعش الفريق الأول من الناشئين غير ٥ لاعبين معظمهم يتدرب فقط لاستثناء محمد فتحى وبعض الدقائق القليلة لشكرى نجيب ومحمود حمد وكمان حضرتك اللى رفضت قيد مهند لاشين فى اخر عهدك.

٣- المجلس الحالى بيهد اللى عملته…

حضرتك عملت ايه غير أن الفريق حصد المراكز السادس والسابع فى الدورى.

٤- انا تعاقدت مع لاعبين تم اختيارهم من قبل عين ثاقبة…

نفكر حضرتك بصفقاتك البالغة ٥٢ صفقة وهم :

جون انطوى – ابراهيم حسن – ياسين علام – شريف رجب – محمود عبده – باسكال انغان

– كريم عطا – أحمد العش – على جلال – صالح موسى – شوقى السعيد – محمد عصام – محمد شعبان زيكا – باشيرو عبدول – محمود عبد العزيز – كوفى ميشاك – عصام الحضرى – مصطفى السيد – محمد الشامى – النيجيرى كلاتشى – أحمد سمير فرج – أحمد عليوة – عبد الحميد شبانة – بهاء مجدى – أحمد ناصر – البرازيلى لوبيز – محمد مجدى خطاب – أحمد أبو زيادة – محمد الجيلاني – كريم الضو – إيمانويل بناهينى – كينيث اكوكشيكو

– محمد صبحى – مروان محسن – مصطفى عفروتو – عماد حمدى – محمد أسامة حناكة – عبد الرحمن عوض شيكا – أحمد سمير محمد – شيكابالا – سعد حسنى – طه عادل – توريك جبرين – إسلام جمال – شريف عبد الفضيل – كريم بامبو – عمرو عبد الفتاح – محمد أبو المجد بوشا – محمد عادل جمعه – شريف حازم – سامح عبد الفضيل – أحمد الصعيدى.

– ميدو مدرب متميز وكان لازم يستمر علشان كان هيجيب بطولات للإسماعيلى…

حضرتك اللى جبت ميدو وحضرتك اللى مشيت ميدو عقب واقعة “انا ورايا بلد”

٥- انا قلت لطاهر ابو زيد فى أول لقاء تليفزيونى عقب تولى النادى اننا هنكون فى المركز السادس…

حضرتك صادق فعلا ونفذت ما تحدثته.

٦- الناس اللى بتجيب لاعيبه وبتستفاد…

هنا على ما اعتقد تقصد احد وكلاء اللاعبين واظن ان تعاملت مع هذا الوكيل وكان سبب فى تعاقد مع من هو وكليهم ” جون انطوى، ابراهيم حسن، محمود عبد العزيز” وايضا كان سبب فى تعاقد بمبلغ خيالى مع الشركة الراعية عقد البث البالغ ٢١ مليون وعقد الراعية تقريبا ٣٠ مليون ولابد ان حضرتك عندما تكون مسئول وتتحدث فتتحدث بأدلة جامعة يعنى هذا الوكيل لو حصل على عمولة من النادى فعليك ان تخرج المستند الذى يدل على هذا وليس تتحدث مثل الأشخاص العاديين، ولك أن تتخيل ان أعضاء منتخب مصر والمنتخب الأوليمبى صادق وعبد الرحمن مجدى ووجية عبد الحكيم وكيلهم هذا الوكيل وأفضل لاعب فى الموسم الحالى محمد فوزى هو أيضا وكيله.

٧- العيال الصغيرة بيعيطوا على الإسماعيلى…

وكانوا كمان بيعيطوا ايام حضرتك وبالامارة الإسماعيلى فى عهد سيادتك حقق الرقم القياسي العالمى وأصبح اول فريق يحقق التعادل فى ١٩ مباراة خلال موسم واحد.

٨- النادى مش محتاج حد يصرف عليه بسبب دخل النادى الحالى وبيع لاعبين مقابل ٢٠٠ مليون جنيه…

هو حضرتك بتجيب الأرقام دى منين؟ حضرتك كمان لما كنت بتأخد ٦٠مليون بث ورعاية ومن برزنتيشن فى ٣سنوات كان دخل كبير فى وقتها وكان المجلس السابق برئاسة المهندس نصر ابو الحسن دخل النادى وقتها ٣ مليون فقط “كل وقت وله اذان سيادتك”

كمان الإسماعيلى باع لاعبين السنادى مقابل ٩٢ مليون فقط مش ٢٠٠ مليون

كمان المجلس الحالى زود مرتبات العاملين وأضاف علاوتين حضرتك رفضت تضيفهم على مرتبات العمال بالإضافة للعلاوات الجديدة وكمان المجلس الحالى بيصرف الرواتب يوم فى الشهر وكمان المجلس الحالى اكتر مجلس فى تاريخ النادى سدد فلوس الضرائب ١٧ مليون جنيه وحضرتك لم تسدد الضرائب ٥ صاغ، كمان المجلس الحالى سدد ٤ مليون جنيه للتأمينات الاجتماعية وحضرتك طبعا لم تسدد ٥ تعريفه للتأمينات وفوق ده صدر حكم قضائى بحبس اللواء فتحى بلبل وقبله الأستاذ محمود اليسقى وكمان الموظف اللى كان بيطلع معاش ماكنش بيأخد معاش شهرى بسبب ان النادى مابيدفعش تأمينات الموظفين بالإضافة إلى ٣ ملايين جنيه لشركة الكهرباء ومازال السداد مستمر ، كمان حضرتك ماكنتش بتدفع مرتبات لقطاع الناشئين غير لنفرين مع رئيس القطاع وطبعا الأنشطة الرياضة ماكنتش هى كمان بيتصرف عليها ٥ ابيض الا ان المجلس الحالى بقيادة ابراهيم عثمان أعاد الأنشطة الرياضية متمثلة فى ٢٠ لعبة فردية وجماعية وحققت إنجازات على المستوى الدولى والمحلة آخرها صعود فريق كرة اليد للدورى الممتاز، اخر حاجة فى النقطة دى حضرتك كنت بتأخر المرتبات شهرين وتلاته والموظفين بيعملوا وقفات احتجاجية، كمان من الفلوس دى ١١ مليون تم سدادها لنادى دريمز غرامة جون انطوى التى لم تسددها.

٩- جايبين واحد بتاع تسويق معندهوش فكرة عن التسويق؟

زى ما قلت فى البداية حضرتك ماينفعش تقول كلام مشجعين مفترض ان لا يخرج من فم رئيس نادى سابق،مدير التعاقدات الحالى له ما له وعليه ما عليه وهو يعمل وفق منظومة يديرها مجلس إدارة كما كنت تفعل حضرتك مع لجنة التعاقدات فى عهد مجلسك وهم أيضا ليس لهم علاقة أيضا بالتسويق ولا خريجى المعهد الدولى للدراسات الرياضية بزيوريخ التابع للفيفاواذا خرج المهندس إبراهيم عثمان وتحدث عنهم بنفس اسلوبك سيكون هذا ردى كما هو ردى عليك رغم يقينى التام بأنها كانت لجنة فاشلة بامتياز.

١٠- جايبين على ابو جريشة صورة…

ماينفعش حضرتك تكون رئيس سابق لنادى بحجم الإسماعيلى وعلى افتراض ان حضرتك رمز من رموز البلد انك تقول على الكابتن على ابو جريشة انه صورة حتى لو ده حقيقى،واذكر حضرتك بأن الكابتن انوس تولى رئيس قطاع الكرة الساعة ٩ مساء وأعلن اعتذاره بعدها بساعتين والكابتن خلال بيومى كان فى نفس المنصب ومشى بعد اسبوعين.

١١- فى خلل فى المنظومة لازم اجيب مدير فنى كويس ومدير قطاع ناشئين كويس ومدير كورة كويس…

حضرتك تولى مسئولية الفريق فى عهدك ١١ مدرب ( المنياوى – وهبة – شوقى غريب – العجوز – ريكاردو – طارق يحيى – ميدو – اشرف خضر – النابى – القماش – عماد سليمان)

وافكرك ابراهيم عثمان اللى عنده خلل سدد غرامات ريكاردو والنابى ولاعيبة فى عهدك حضرتك لم تسدد لهم مستحقاتهم.

افكرك كمان ان المهندس إبراهيم عثمان هو من احضر ديسابر واستراكا وبيدرو وفييرا ومضوى وهو من جدد عقود باهر ومتولى وإبراهيم حسن ومحمد فتحى ومتولى ورغم ذلك فى أخطاء الجميع معترف بها الا ان هناك صفقات تمت على أعلى مستوى فنى أفاد الفريق زمنها على سبيل المثال دييجو كالديرون ومحمد صادق وعبد الرحمن مجدى وشيلونجو ومحمد مجدى.

بالنسبة لمدير قطاع الناشئين، أود أن اذكر حضرتك ان رئيس القطاع الناشئين الحالى واحد اسمه سيد بازوكا كان كابتن منتخب مصر وكابتن النادى وفى فرقه مواليد ٩٩ السنادى اخدت دورى جمهورية وهياخدوا مكافآت كمان من النادى وليس من الشيخ عزت اللى كتر خيره كان بيجيب الرز والبطاطس والفراخ للعيال فى فندق الناشئين.

محمد بك ابو السعود حضرتك اسم كبير فى الإسماعيلية ومن غير اللائق ان تتحدث بهذا الأسلوب الذى لا يليق بك ولا بمنصبك ولا بسنك واكرر ان من حقك الانتقاد ولكن فى نقاط محددة وليس بكلام عشوائى وكان يكفى ان تقول ان الإسماعيلى ليس فى مستواه ومطلوب من الإدارة ٣،٢،١ واذا لم تفعل فعليها ان تفكر مجددا فى استمرارها، وقتها سيكون كلامك منطقى.

١٢- التحدث عن بيع القوام الأساسى وعدم التجديد لهم…

من فرط فى حمص؟

من فرط فى عمر جمال؟

من فرط فى احمد سمير فرج؟

من فرط فى احمد خيرى؟

من فرط فى محمد صبحى ثم اعاده ثم امتنع عن سداد ٢.٥ مليون جنيه له ؟

من فرط فى احمد عبد العزيز مودى ؟

من فرط فى جودين اندبيسى ؟

من فرط فى عبدالله الشحات؟

من فرط وباع عمر السولية؟

من  باع مروان محسن قبل مباراة الزمالك فى قبل نهائى كأس مصر؟

أليس هؤلاء جميعهم من القوام الاساسى للفريق.

 

أن كنت ناسى افكرك ان عندما كان الإسماعيلى يهزم وينهى الدورى فى المركز السادس والمركز السابع لم تتقدم باستقالة واستمريت مدتك كاملة ولم يخرج اى رئيس نادى سابق يقول تانى ومانى وقتها.

اخيرا.. جميع من تولى المسئولية داخل النادى الإسماعيلى من رؤساء او أعضاء هم أشخاص على قدر كبير من الاحترام وفعلوا قدر استطاعتهم لرفع اسم النادى الإسماعيلى وقد حققنا على مر تاريخنا ٦ بطولات ٥ منها مع المهندس عثمان أحمد عثمان وأبنائه المهندس إبراهيم والمهندس احمد والبطولة الوحيدة التى تحققت للنادى خارج العائلة العثمانية كانت دورى ٩٠ مع الدكتور رأفت عبد العظيم.

Leave a Reply

لن يتم نشر عنوان بريدك الإلكتروني. الحقول الإلزامية مشار إليها بـ *

المزيد من أخبار مصرية