Connect with us

أخبار مصرية

محمد مظهر يكتب : هات ودنك يا بشمهندس

من وجهة نظرى التى لها قيمة أرى أن تصريحات المهندس إبراهيم عثمان الأخيرة بخصوص عدم قبول محمود متولى كابتن الفرقة ٤.٥ مليون جنيه وتهرب كريم بامبو من التجديد فى غير وقتها خاصة وان الموسم الحالى طويل وسوف ينتهى فى شهر أغسطس بسبب كأس الأمم الأفريقية مصر ٢٠١٩.

كنت أفضل أن يتم معالجة الأمر بمزيد من العمل وليس بتصريحات جاءت بعد غياب طويل، كنت اتمنى فى حالة عدم الوصول إلى اتفاق مع كريم بامبو الذى ينتهى تعاقده بعد انتهاء مباريات الموسم الجارى ان يتم التفاوض مع لاعب بقدرات تفوق قدرات بامبو وعند الإعلان عن التعاقد معه نعلن تهرب بامبو وغلق هذا الملف.

اما بالنسبة لمحمود متولى فيتبقى له مع الإسماعيلى موسم اخر ولا أعلم فى زمن التشكيك والاتهام بالخيانة والتطبيل ومش عاوزين نكسكس “على رأى كابتن حمادة أمام” نقدر نقول رأى ام لا، هل يتم سحب إشارة القيادة من اللاعب وجلوسه على دكة البدلاء او الاكتفاء بمشاركته فى مران الفريق فقط ام يواصل مشواره ونحاول معه من جديد ونرفع المبلغ من ٤.٥ مليون إلى ٥ مليون ولو مرضيش نرفع المبلغ لخمسة ونص، طب ولو وافق اللاعبين الآخرين هيكون وضعهم ايه؟

هات ودنك يا بشمهندس علشان هقولك كلام بما يرضى الله واعلم انك بتسمع كويس واعلم ان كل ما يقال عنك من عيال الفيس بوء كلام اونطه من انك ديكتاتور وبخيل، ولكن فى ناس عندها حق فى الهجوم عليك كرئيس للنادى والمسئول عن الكرة لان بالأرقام والحروف الفريق خرج من البطولة العربية “من المولد بلا حمص” وخرج من بطولة أفريقيا “قفاه يقمر عيش” وفى الدورى مش هتكلم عن مركز الفريق علشان لسه له مباريات مؤجلة ولكن الفريق كسب ٧ مباريات وتعادل مثلهم فى ٧ مباريات وخسر فى ٦ مباريات وهزت شباك الفريق بعشرين جول وأحرز الفريق ١٩ فقط، المطلوب الاستعداد من الآن للموسم المقبل.

لابد من وضع خارطة طريق نبدأ فيها من أمس وليس اليوم، نبدأ ونعمل بسرعة الصاروخ.

خطوات ومقادير النجاح فى مجال كرة القدم معروفة ومعلومة للجميع اولها تواجد إدارة رياضية، ثانيا مدير فنى مميز من التلاته المعروضين عليك سواء الاهلاوى او الزملكاوى او الاسمعلاوى بلاش المدربين اللى بنجيبهم من على المزلقان فى أوروبا، ثالثا توفير المال سواء من إيرادات النادى أو من مال حضرتك، رابعا وأهم حاجة هم اللاعبين اللى احسن من اللى عندنا.

غير كده يا بشمهندس الناس هتستمر فى الشتيمة والإهانة وانت أعصابك هتكون مضغوطة ودائما عاوزك تتذكر هتافات الجماهير فى الشوط الاول من ماتش الافريقى التونسى فى الإسماعيلية علشان نمشى صح.

النصيحة دى لوجه الله والكلام ده من الاخر فعلشان ماتتعبش نفسك وتتعب الجماهير ياريت ننجز.

Leave a Reply

لن يتم نشر عنوان بريدك الإلكتروني. الحقول الإلزامية مشار إليها بـ *

المزيد من أخبار مصرية